بہار کے عوام ترقی کے لئے ہمیں ووٹ دیں ۔ مودی

وزیر اعظم نریندر مودی نے بہار حکومت کے ایک وزیر کے رشوت ستانی میں پھنسنے پر طنز کرتے ہوئے آج وزیر اعلی نتیش کمار کا نام لئے بغیر کہا کہ جب سے انہوں نے نیا جوڑی دار( مسٹر لالو پرساد یادو) ڈھونڈلیا ہے، اس کے بعد سے ان کے کارنامے بدلنے لگے ہیں اور اگر انتخابات کے بعد ایسے لوگوں کی حکومت دوبارہ بن گئی تو بہار میں کچھ نہیں بچے گا۔

وزیر اعظم نے بہار کے ووٹروں سے سیاست کرنے کے بجائے ترقی کرنے والی حکومت کو ووٹ دینے کی اپیل کرتے ہوئے کہا کہ جب بہار ترقی کرے گا تو ملک ترقی کرے گا۔

ریاست میں تعلیم، صحت سمیت کئی شعبوں کی بدحالی کا ذکر کرتے ہوئے انہوں نے کہا کہ مرکز ی حکومت کی جانب سے کئی منصوبوں کے لئے پیسے بھیجے گئے لیکن سیاست



میں ڈوبی ہوئی حکومت ان میں سے نصف سے زائد رقم خرچ نہیں کر پائی۔

مسٹر نریندرمودی نے کہا کہ اگر بہار کے لوگ جے پرکاش نرائن (جے پی) کو سچا خراج تحسین پیش کرنا چاہتے ہیں تو ایسے لوگوں کا ا سمبلی انتخابات میں چن-چن کر صفایا کردیں۔

انہوں نے کہا کہ شہید جگدیو پرساد نے اپنی پوری زندگی غریب کے حقوق کے لئے جنگ لڑتے ہوئے گزار دی، اور جس پارٹی کے دور حکومت میں ان کا قتل ہوا ،آج انہی لوگوں کے ساتھ وزیر اعلی اور آر جے ڈی صدر بیٹھے ہیں۔

مسٹر مودی نے یہاں قومی جمہوری محاذ ( این ڈی اے) کے امیدواروں کے حق میں منعقد ہ انتخابی ریلی میں وزیر اودھیش کشواہا کی اسٹنگ پر نشانہ لگاتے ہوئے کہا کہ جب پورا ہندوستان جے پرکاش نارائن کی جینتی بدعنوانی کے خلاف اعلانیہ کے طور پر منا رہا تھا، تب ان کے شاگرد چار لاکھ روپے رشوت لیتے پکڑے گئے۔